Nagapanawagan ang pila ka mga cause-oriented groups sa Iloilo sa pag-upod sa pagahiwatun nga hublag protesta kontra-korapsyon bwas nga adlaw.
Sa interview sang Bombo Radyo kay Arlie Bosque, Convenor sang Kabataan kontra-kurapsyon, iya ginpahayag nga gina ekspektar sang grupo nga mas madamo pagid sang mga pumuluyo ang magatambong sa Trillion Peso March Rally nga pagahiwatun bwas.
Ang aktibidad ginpa-igo sa Bonifacio Day agud dumdumon ang iya kabaganihan kag pagtindog batok sa “oppression,” kag pagpakita sang paghugpong batok sa nakasistema nga pagpang-abuso kag korapsyon sa pungsod.
Pareho sang Setyembre 21 nga anti-corruption protest, magasugod ini ala 1:00 sang hapon halin sa Jaro Plaza kag University of the Philippines Visayas–Iloilo City padulong sa Iloilo Provincial Capitol Ground.
Dugang pa ni Bosque nga dapat may mapasakaan na sang kaso may kaangtanan sa flood control scandal, gani kinahanglan nga mas madamo nga pumuluyo ang maghugpong agud mahatag ang hustisya nga nagakadapat.
Sa karun, nagapanawagan ang grupo sa publiko sa pag-upod sa nasambit nga rally bwas nga adlaw, sa pagpanawagan sang hustisya sa kurapsyon sa pungsod.
