Ginkalipay sang Presidente sang E-bike Association sa Jereos, La Paz ang temporaryo nga suspensyon sang pag-impound para sa mga e-bikes, e-trikes kag iban pa nga light electric vehicles (LEVs).
Sa interview sang Bombo Radyo kay Rey Cachuela, iya ginpahayag nga suportado niya ang desisyon ni LTO Chief Assistant Secretary Markus V. Lacanilao nga temporaryo anay nga untaton ang pag-impound samtang ginaplastar ang mas klaro nga guidelines sa paggamit sang LEVs.
Suno kay Cachuela, nalipay siya bangud ang katuyuan sang suspensyon amo ang paghatag sang mas komprehensibo nga pag-eksplikar sa publiko parte sa mga patakaran kag pagsulundan sa paggamit sang LEVs sa karsada.
Ginpahayag niya nga importante nga maintindihan sang commuters kag operators ang mga regulasyon agud malikawan ang nagakalatabo nga paglapas kag kaayuhan man sang trapiko.
Matandaan nga antes sang suspensyon, gin-anunsyo ni Lacanilao nga magasugod ang istrikto nga pagpatuman sang regulasyon lakip ang pagdakup kag pag-impound sang mga LEVs nga nagalapas sa patakaran nga wala sang bisan ano nga exemption pag-abot sang Enero 2 sa masunod nga tuig.
