Nagalaum ang Alas Pilipinas Women’s volleyball team nga matapos na ang duha ka dekada nga medal drought sa masunod nga 33rd Southeast Asian Games sa Thailand.
Ini matapos nga nagpagguwa ang Philippine Olympic Committee (POC) sang opisyal nga listahan sang 14 ka players nga magatiglawas sang pungsod.
Pangunahan sang beterana nga setter nga si Jia De Guzman ang lineup, upod ang mga libero nga sanday Dawn Catindig kag Justine Jazareno, samtang mangin pwersa sa net defense ang mga blockers nga sanday Dell Palomata kag Maddie Madayag.
Nalakip man sa listahan ang mga bata-on nga spikers nga sanday Bella Belen, Shaina Nitura, Angel Canino, Alyssa Solomon kag Alleiah Malaluan, kag middle blocker nga si Amie Provido.
Sa frontline offense, yara man ang mga attackers nga sanday Vanie Gandler, Eya Laure, kag setter/opensa nga si Mars Alba.
Ang ila coach amo si Jorge de Brito nga nagpamuno sa Alas Women sa breakthrough sa AVC Nations Cup sini nga tuig kag pila pa ka podium finishes.
Sa nagahilapit nga SEA Games, nagapadayon ang preparasyon sang team nga may dako nga paglaum nga makabalik sa medal standings matapos ang 20-ka-tuig.
