Masobra tunga sa milyon nga balor sang droga ang nakumpiskar sa isa ka anay preso sa buybust operation nga ginkasa sang City Drug Enforcement Unit sa Brgy. Boulevard, Molo, Iloilo City sang Disyembre 5.
Ginkilala ang subject kay Alyas Niko, 35-anyos, residente sang nasambit man nga barangay kag ginakabig nga High-Value Individual.
Sa interview sang Bombo Radyo kay Police Captain Roque Gimeno III, officer in charge sang CDEU, ginpahayag sini nga madugay na nila nga ginabantayan ang arestado antes ini natigayon nga nadakpan.
Nabaklan ini sang mga otoridad sang 1 sachet nga suspected shabu nga nagabalor sang P5,000 kag may dugang nga na-recover sa iya possession nga anum ka sachets.
Ginabulubanta nga yara sa masobra 100 grams ang nakumpiskar nga suspected shabu nga may standard drug price nga P680,000.
Nahibaluan man nga may kaso ini nga robbery sadto pa, kag bag-o lang ini nakagwa sa presohan sa kaso nga illegal possession of firearms ukon paglapas sa RA 10951 sini lamang nga tuig.
Sa karon, yara na sa kustodiya sang kapulisan ang arestado kag pasakaan ini sang nagakaigo nga kaso ukon paglapas sa RA 9165 ukon Comprehensive Dangerous Act of 2002.
