Nagapangabay ang pila ka vendors sang Mandurriao Public Market nga patapuson na lang anay ang bulan sang Disyembre antes sila magsaylo kaupod ang sa Wet Section vendors agud makabawi man sila sa ila kita sa sini nga bulan sang paskwa.
Sa interview sang Bombo Radyo kay Rolyn Gallaza, Secretary sang Association of Vendors sa Mandurriao Public Market, iya ginpahayag nga kun matigayon ang pagsaylo sini nga bulan, posible nga magtuga sang indi pagkatultol sang mga customers sa ila naandan nga ginabaklan kag maapektuhan gid ang pangabuhian sang mga vendors.
Suno sa iya, mas mahapos para sa mga manugbakal kon sa isa lang anay sila ka lugar ang padulungan samtang nagapadayon pa ang construction sa merkado.
Dugang pa sini nga mas maayo para sa operasyon sang merkado kun tingob ang pagpasulod sang tanan nga vendors kag tingob man ang ila pagpaguwa kon kinahanglan.
Sa matandaan nga may yara sang masobra 200 ka mga vendors ang naga-operate sa Mandurriao Public Market, apang 80 pa lang ka kiosks ukon stalls ang nahuman sa bag-o nga merkado.
