Ginmanduan ni Passi City Mayor Stephen Palmares ang Hepe sang Passi Police Station nga si PLt Col. German Magbanua nga hibaluon kag imbestigaran ang natabo nga ginamo sa opening of lights sa banwa sang Passi.
Ang kinagamo natabo sangkaaghon sang Disyembre 8, 2025.
Naaktohan man nga may nagvideo sa natuhoy nga kinagamo kun sa diin makit-an nga may ginakaptan nga kutsilyo ang isa ka lalaki.
Gintambangan man sang mga tawo sa palibot ang mga lalaki nga nagaginamo apang makit-an man nga halos indi masarangan nga mapunggan ang mga ini.
Kaangot sini, ginmanduan na ni Mayor Palmares ang mga awtoridad kag mga opisyales sang barangay nga kinahanglan matumod na subong nga adlaw ang rason sang kinagamo kag mahibal-an man kun tumandok sang Passi ang mga ini ukon pangayaw.
Suno pa sa alkalde, possible nga pasakaan sang kaso ang mga ini.
