Ginhatag sang Philippine National Police (PNP) ang kabug-usan nga P10.6 million sa 30 informants nga nagbulig sa pag-aresto sang 30 wanted criminals sa bug-os nga pungsod.
Ginpatigayon ang amo nga event sa Camp Crame kun sa diin ginbaton sang mga informants ang ila premyo nga nakabutang sa plastic envelopes kag nakasuksok sang full-face masks ang mga ini agud maprotektahan ang ila identity.
Suno sa ahensya, halin sa PNP intelligence fund ang pondo para sa ginhatag nga cash rewards nga gin-aprubahan sang Department of the Interior and Local Government (DILG).
Nahibaluan nga ang mga naaresto ang may kahilabtanan sa dalagkuan nga krimen kaangay sang murder, rape, kag homicide.
Ang pinakadako nga reward nga P5.3 million ang ginhatag sa informant nga nagbulig sa pag-aresto sang suspect sang Pebrero 2023 nga wanted sa 7 counts of murder kag 25 counts of frustrated murder.
Samtang, ang pinakamagamay nga reward nga P50,000 ang ginhatag naman sa informant nga nagbulig sa pag-aresto sang suspect sa Kalinga sang Enero 2024 nga may double murder charges.
Ginpunto ni PNP acting chief Lt. Gen. Jose Melencio Nartatez ang importansya sang pagpakig-ugyon sang publiko sa pagtapos sang krimen, kag gin-abisohan ang mga pumuluyo nga padayon nga mag-report sang importante nga mga impormasyon sa kapulisan.
