Tuman ang kalipay sang duha ka mga Ilonggo nga nangin kabahin sila sang national team nga nakahimo sang maragtas matapos nakasulod ang Pilipinas sa semifinals sang men’s football tournament sa Southeast Asian (SEA) Games sa labing-una nga tion sa sulod sang 34 ka tuig.
Ini amo sanday Selwyn Nickos Mamon, tumandok sang Janiuay, Iloilo; kag si Jaime Rosquillo nga tumandok naman sang banwa sang Barotac Nuevo.
Kagab-i, ginlutos sang Pilipinas ang defending champion nga Indonesia, 1-0, nga rason kun ngaa naka-abante ini sa final four sa labing-una nga tion halin sang 1991.
Suno kay Mamon, nag-umpisa sila sa paghanas sa training camp sang Nobyembre 25. Ginbutang gid sa ila paminsaron nga mag-focus, magpamati gid sa tactics sang ila coach, kag maghatag sang atensyon “one game at a time.”
“Sobra gid ka-happy kami tanan kay nagdala kami pride kay indi lang pangalan namon ang amon dala diri, kundi bilog gid nga bansa ang amon nga gina-represent sa SEA Games,” suno kay Mamon.
Sa bahin ni Rosquillo nga nakahampang man anay sa SEA Games sa Vietnam sang 2021, ginpahayag sini nga importante nga bahin sang ila kadalag-an ang komunikasyon sa isa kag isa kag pagtuman sa coach.
“Ginapaminsar ko gid nga magnami ang hampang namon kag mag-communicate kami sa isa kag isa, kag mamati kami sa coach. Before kami magguwa, ga-pray gid kami. Wala gid kami nag-expect nga amo to ang resulta kagab-i, wala gid kami naghuna-huna nga madaog kami,” suno sa iya.
Lunsay man nagpasalamat ang duha ka players sa ila tagsa ka pamilya, mga abyan, taga-suporta, kag sa ila mga coach sa Iloilo nga amo ang naghanas sa ila tubtub nga nakalab-ot na sila sa international stage agud itiglawas ang Pilipinas.
Balantayan ang semifinals sang men’s football tournament sa Disyembre 15.#
