Naghimo sang maragtas ang Philippine national women’s team matapos nakasulod sa finals sang Southeast Asian Games sa labing-una nga tion sa maragtas sang Pilipinas.
Sa semifinal match sa Chonburi Daikin Stadium subong nga gab-i, Disyembre 14, ginlutos sang Filipinas ang host nation nga Thailand paagi sa penalty shootout, 4-2, matapos nagtakop ang hampang sa 1-1 kasunod sang extra time.
Una nga naka-goal ang Thais paagi kay Jiraporn Mongkoldee sa ika-53 nga minuto. Nagbato ang Philippine national team kag nabuhi ang paglaum sang napatas ang skor sa ika-87 nga minuto paagi kay Jael-Marie Guy (penalty). Matapos ang tunga sa oras, 1-1 sa gihapon ang skor rason nga nagpadayon sa penalty shootout. Perfect 4-for-4 ang Pilipinas.
Sa bahin sang Thailand, naka-miss si Pluemjai Sontisawat, kag sang naglapaw sa net ang bola halin kay Orapin Waennngoen, didto na kag nasigurado ang labing-una nga finals appearance sang Philippine team sa football tournament sa SEA Games. Sa Myerkules sang gab-i, atubangon sang Filipinas ang defending champion nga Vietnam sa Chonburi Stadium.
Una na nga gin-upset sang national team ang mga Vietnamese sa group match, 1-nil.
Words by: Bombo Jissa Padios
