Nagguwa sa pagpangusisa sang independent panel sang medical experts nga makasarang pa si anay Presidente Rodrigo Duterte nga mag-atubang kag magpartisipar sa pre-trial proceedings sang International Criminal Court ukon ICC.
Sandig sa findings sang panel, “competent” ang anay presidente para magpakigbahin sa proceedings.
Sa siyam ka pahina nga obserbasyon ni ICC deputy prosecutor Mame Mandiaye Niang, ginpanawagan sini sa ICC Pre-Trial Chamber I nga maghimo na sang konklusyon nga may ikasarang ukon kapasidad pa si Duterte sa mga proceedings sang ICC lakip na sa confirmation hearing.
Suno kay Niang, sandig sa medical experts, nakahangop si Duterte sa kaso kag sa mga ebidensya.
Nahangpan sini ang pagpatigayon, ang katuyuan, kag ang kunsekwensya dala sang pre-trial proceedings.
Makahatag man ini sang instruction sa iya nga abogado para sa preparasyon sa pagdepensa sa iya.
Ginsiling man sang prosecutor nga nagapakuno-kuno lang si Duterte sang gin-assess ini sang mga eksperto, kag indi mapatihan ang mga reklamo sini kaangot sa iya ikaayong lawas.
Bangud sini nga findings, ginduso sang deputy prosecutor nga mag-resume na ang proceedings batok sa former president.
Ginbali naman sang abogado ni Duterte nga si Nicholas Kaufman ang joint report sang panel.
Nag-request si Kaufman sang “evidentiary hearing”.
Ini agud nga may kahigayunan ang magtimbang nga partido nga maathagan sa konklusyon sang mga eksperto, ang ila rason sa amo nga mga konklusyon, kag ang paagi nga gingamit sang sila ang nag-interview.
Matandaan nga una na nag-petisyon ang kampo ni Duterte nga i-adjourn ukon tapuson na ang proceedings bangud malipaton na si Duterte gani nga “unfit” na ini ukon indi makasarang nga mag-atubang sa trial.
Kun balikan, nagtukod ang ICC sang panel nga ginabug-usan sang tatlo ka mga eksperto nga may espesyalisasyon sa forensic psychiatry, neuropsychology, kag geriatric kag behavioral neurology.
Sila ang ginsugo nga mag-determinar kun naga-suprer bala si Duterte sa anuman nga medical condition nga maka-apekto sa iya nga abilidad nga magsunod ukon magpakigbahin sa nagapadayon nga pre-trial proceedings.
