Posible nga palawigon pa sang Department of Agriculture (DA) kag Sugar Regulatory Administration (SRA) ang moratorium sa sugar importation nga ginalauman nga matapos sa 2026 ukon pagtapos sang milling season.
Ang amo nga tikang, nagatuyo nga maprayoridad ang lokal nga produksyon sang kalamay, ilabi na sa tunga sang mabaskog nga suplay sang kalamay sa pungsod.
Sa isa ka pahayag, ginsiling ni Agriculture Secretary Francisco Tiu Laurel Jr. nga ang polisa gin-anunsyo una sang Oktubre 15, kun sa diin ginpahayag ang posible nga pag-extend sang moratorium matapos ang milling season, depende sa aktwal nga lebel sang sugar stocks.
Ini kasunod sang mas mataas nga raw sugar output sang nagligad nga tuig.
Magluwas sini, ginpahayag man nga nagapreparar ang DA kag SRA sang isa ka regulatory framework para sa molasses importation, nga nagatuyo nga maprotektahan ang mga lokal nga producer sang kalamay kag masiguro ang balanse sa industriya sang amo nga produkto.
