Nakumpirma sa toxicology report sang Philippine National Police (PNP) nga nagpositibo sa antidepressant drug ang bangkay ni anay Department of Public Works and Highways (DPWH) Undersecretary Catalina Cabral.
Sa resulta naman sang histopathological exam, wala sang abnormalities ukon terminal diseases ang anay opisyal.
Nag-match man ang iya nga fingerprint sa nauna na naggwa nga imbestigasyon.
Antes ang resulta sang toxicology report, una na nga ginkumpirma sang kapulisan nga may na-recover nga kutsilyo kag bulong sa hotel room nga gintiniran ni Cabral.
“‘Yong knife for self protection or panggamit niya lang inside the bag while the medication we secured, we put that into study that’s why during the conduct of autopsy we also took tissues so that we can study if these medications were used,” suno kay acting PNP chief Jose Nartatez, Jr.
Huwebes sang gab-i sang nasapwan ang lawas ni Cabral sa idalom sang pil-as sa Kennon Road sa Tuba, Benguet.
Ginpahayag sang Department of the Interior and Local Government (DILG) nga base sa autopsy, wala nakitaan nga may foul play sa kamatayon sini — wala sang senyales nga nagbato ini, wala sang skin cells sa iya nga fingerprints, kag wala man sang bala ukon samad sa iya lawas nga nagapatimaan nga ginsakit siya ukon gintiro.
Nahibaluan nga isa si Cabral sa na-implicate sa flood control corruption kag isa sa ginapatihan nga may daku kuntani nga inugbulgar sa nagakatabo nga eskandalo sa ahensya.#
