Nagpaandam ang MORE Electric and Power Corporation nga makasuhan ang sin-o man nga magapalupok kag maka-damage sa mga electric lines nga ila nasakupan sa syudad sang Iloilo.
Sa interview sang Bombo Radyo kay Angel Tan, spokesperson sang MORE Power, iya ginpahayag nga ini nga pahanumdom base sa Republic Act No. 11361 ukon Anti-Obstruction of Powerlines Act nga napasar sang 2019 nga nagaproteher sa continuous electricity flow kag kontra sa bisan ano nga obstructions sa mga power lines.
Ginbantayan man sini ang mga mataas nga poste kag electric facilities nga posible maigo sang mga palupok, ilabi na sa selebrasyon sang Bag-ong Tuig.
Suno sa MORE Power, sa bug-os nga operasyon sang syudad, wala pa sang nadakpan nga nakadamage sang electric lines, apang ginapahanumdom gihapon ang publiko sang peligro.
Ginapangabay sang kompanya nga ang mga fireworks display himuon sa malayo nga distansya sang mga power lines agud malikawan ang power interruptions.
Ginpanawagan man nila sa mga barangay kapitan nga gilayon ireport ang mga indibidwal nga nagatuga sang damages sa mga linya para marespondehan kag maimbestigaran ang hitabo.
