Ginpasalig sang Department of Agriculture nga mangin prayoridad sini subong nga 2026 nga mangin patas sa presyo sang humay.
Hatagan man sang ahensya sang pagtamod ang pagpasangkad sang P20-per-kilo rice program kag dasigon ang pagtukod sang farm-to-market roads (FMRs).
Suno kay Agriculture Secretary Francisco Tiu Laurel Jr., importante ini nga mga tikang agud nga masustiner ang rice production. Makabulig ini suno sa iya nga mangin barato ang pagkaon kag mangin mas mahapos sa mga mangunguma nga dal-on ang ila nga ani sa mga merkado.
Pahayag sang ahensya, padayunon ang procurement sang National Food Authority (NFA) kun sa diin P17 per kilo ang bakal sa wet palay kag P21 per kilo para sa dry palay.
Nagpakig-angot naman ang ahensya sa industry stakeholders agud malikawan ang pagpanglakaak sang import nga magapanubo sang presyo sang local harvest.
Sa 2025, matandaan nga tubtub lang sa 3.5 million metric tons ang ginpahanugutan nga rice imports halin sa 4.8 million tons sang 2024.
