Nasapwan ang isa ka Ilongga overseas Filipino worker (OFW) nga wala na sang kabuhi sa ginatiniran sini nga hulot sa Abu Dhabi, United Arab Emirates.
Ini amo si Mary Jill Dela Cerna Muya, tumandok sang Jaro, Iloilo City.
Sa interview sang Bombo Radyo kay alias June, anay bana sang biktima, iya ginpahayag nga naglapta ang pictures ni Mary Jill kun sa diin makit-an nga may busal ini sa baba kag may higot sa liog. Nagadapat man ang tiil sang biktima sa salog.
Nagaguwa sa impormasyon suno sa pamilya nga nagpanginmatay si Mary Jill, apang nagapati sila nga may foul play sa hitabo.
Suno kay alias June, nakit-an man nila nga may lagob sa kamot sang biktima.
Nagdangop sila sa Bombo Radyo agud mabuligan nga mapapauli ang bangkay sini sa Iloilo.
Pahayag sang pamilya, ginabanta duha ka dekada nga naga-trabaho sa luwas sang pungsod si Mary Jill.
“TNT” ang status sini subong, ukon ang termino sang mga Pilipino nga “tago nang tago” samtang naga-trabaho sa abroad. Base sa iya nga bata, nagabulig kun kaisa si Mary Jill sa pag-cater kun may mga okasyon.
Sandig sa pamilya, nag-umpisa sila nga matingala sa sitwasyon sini matapos nga wala man ini nakapangamusta ukon nakapanamyaw sa iya bata sang Christmas.
“Nagapangayo kami sang bulig sa OWWA kag sa DFA nga makita na sang bata ko ang iya iloy nga dal-on diri sa Pilipinas,” panawagan ni Alias June.
“Wala kami sang kontak didto, ang picture lang gid ang nagalapta,” suno pa sa iya.
Nagpanawagan man ini sang bulig sa Iloilo City Government nga mapapauli ang bangkay apisar nga TNT ang status sang iya anay asawa.#
