Indi na pagdayunon ang pagpasaka sang kaso batok sa hubog nga mga indibidwal nga nagpuli sa pagtapungol kag pagtumba kanday Superman, Batman, kag Wonderwoman sa Pototan Plaza.
Sa interview sang Bombo Radyo kay Police Major Bryan Alamo, hepe sang Pototan Municipal Police Station, iya ginpahayag nga natukiban nga lunsay estudyante ang involved sa pagpangsumbag sa superheroes nga nagaserbe kuntani nga dekorasyon sa plaza sang banwa.
Sa anum nga involved, apat ang mga menor de edad.
Pahayag ni Alamo, natigayon ang dayalogo sa ginikanan sang mga kabataan, kag bangud sa konsiderasyon sang alkalde suno sa iya, may nalab-ot nga pila ka kasugtanan kaangay sang pagpasabat sa ila sa gasto sa pag-repair sa superheroes.
Makaluluoy man suno kay Alamo kun dayunon gid ang complaint, magluwas pa nga nagpabutyag man sang ila nga paghinulsol ang mga involved nga kabataan paagi sa intervention sang Municipal Social Welfare and Development Office.
Matandaan nga nakit-an sila sa CCTV footage, na-identify, kag gindala sa kustodiya sang pulis bangud sang malicious mischief.
Suno kay Alamo, bisan daw nahimo nga kaladlawan ang balita sang nagkalatumba ang superheroes, isa ini ka seryoso nga mensahe nga wala ginapalampas sang pulis ang bisan ano nga insidente — gamay man ukon daku.
“At least, nakatilaw na sila nga na-disiplina sila. Kun wala sila nakilala, basi kun mas daku pa gid nga mga insidente ang imbolbaran nila which is illegal,” suno pa sa hepe.#
(Photo: Police Major Bryan Alamo)
