Naglab-ot sa 12 ka mga kabarangayan ang apektado sa Concepcion, Iloilo bangud sang shear line kun sa diin 216 ka mga motor bangka ang nagkalaguba sang nagligad nga Enero 3.
Sa interview sang Bombo Radyo kay Ens. El John Ga, spokesperson sang Philippine Coast Guard (PCG) Iloilo, iya ginpahayag nga nagpatigayon ang PCG sang assessment sa mga apektado nga lugar upod ang koordinasyon sang Local Government Unit (LGU) kag Municipal Disaster Risk Reduction and Management Office (MDRRMO).
Nagdangat man sa 213 ka mga fisherfolk ukon mga manugpangisda ang naapektuhan bangud nagkalaguba ang ila mga bangka.
Sa 216 ka mga motor bangka nga nagkalaguba, 172 ang partially damaged samtang 44 ang totally damaged.
Magluwas sa mga motor bangka, may yara man sang mga cottages nga naapektuhan kag ang iban totally damaged.
Ginatinguhaan naman sang PCG nga makipag-angot sa Bureau of Fisheries and Aquatic Resources (BFAR) kag sa LGU sang lugar agud matagaan sang bulig ang mga naapektuhan.
