Preparado na ang security measures kag deployment plan sang mga kapulisan para sa paalabuton nga Dinagyang 2026.
Sa interview sang Bombo Radyo kay Pcol. Kim Legada, Director sang Iloilo City Police Office, iya ginpahayag nga may ara sang 10 day gun ban nga patigayunon kag paga-umpisahan sa Enero 15 tubtob Enero 25.
Madumduman nga gin-aprubahan kag ginkumpirma ini ni Philippine National Police Chief, Lt. Gen. Jose Melencio Nartatez Jr., agud nga masiguro man ang kalinong sa paalabuton nga mga aktibidad sa siudad.
May ara man sang kaangay nga deployment sang mga kapulisan sang nagligad nga tuig ukon ang Special Task Group Dinagyang.
Naistoryahan man sang mga awtoridad ang Signal Jamming kun sa diin indi pa sigurado kun ini ang ipatuman.
Ini bangud sa madamo man nga komento nga mas maayo kun wala sang signal jamming bangud nga nagaresulta ini sang total signal shutdown.
Wala pa man makahatag sang pinal nga desisyon si City Mayor Raisa Treñas kun pagadayunon gid man ang signal jamming sa siudad sang Iloilo.
Apang nagpasiguro naman ang Iloilo City Police Office nga mangin matawhay ang pagselebrar sang Dinagyang Festival 2026.
