Patay ang duha ka tricycle driver sa natabo nga lab-anay kag tiruhay bangud sa agaway sa pasahero sa Tondo, Manila.
Ang mga biktima amo sanday alyas “Marlon”, 21 kag alyas “Edmond”, 32, lunsay residente sang Tondo.
Base sa imbestigasyon, ginamaneho ni Marlon ang iya nga tricycle sang nasugata sanday Edmond kag isa ka alyas “Eugene” nga lunsay tricycle driver.
Gin-alegar nga ginpahog kag ginbuyayaw sang duha si Marlon kag sang hana na kuntani malagyo, ginpulihan ini sang mga suspek.
Ginlabo ni Edmond si Marlon kag gintiro pa ni Eugene.
May nakaresponde naman nga pulis kag naaktuhan pa ang krimen apang gintayaan siya sang pusil ni Eugene gani napilitan ini magbunot sang pusil kag nagpalupok kag naigo si Edmond.
Dead-on-the-spot si Marlon samtang nadala naman sa ospital si Edmond apang ginbawian man sang kabuhi.
Nakapalagyo naman si Eugene dala ang pusil nga gin-gamit sa pagluthang kay Marlon.
Naggwa sa imbestigasyon nga antes ang krimen, nagbaisay si Marlon kag sanday Edmond kag Eugene bangud sa agaway sa pasahero kag posible amo ang rason kun ngaa natabo ang nasambit nga krimen.
