Yara lamang sa 65% sang 4,810 ka farm-to-market roads ukon FMR projects ang natapos halin sang tuig-2021 tubtob 2025.
Suno kay Department of Agriculture Sec. Francisco Tiu Laurel, Jr., 3,135 ka mga proyekto palang ang nahuman sang Department of Public Works and Highways samtang pila pa ka mga proyekto ang wala pa sagihapon masugudan ukon ginahimo palang tubtob subong.
Ang FMR projects amo ang may ara sang allocated budget nga ₱76.52 bilyon kun sa diin nakahimo na ini sang 2,400 kilometers nga mga dalan nga nangin dako gid ang bulig para sa kapin 721,000 ka mangunguma halin sa nagkalain-lain nga mga komunidad sa bug-os nga pungsod.
Agud nga mas mapatuman ang transparency sa mga farm-to-market road projects, plano nga ilunsyar sang ahensya sa bulan sang Pebrero ang FMR Watch, isa ka online platform para sa real-time nga pagmonitor sang mga proyekto.
Ang ahensya naman sang Department of Agriculture ang magakapot subong sa mga natuhoy nga proyekto bangud sa kontrobersiya angot sa corruption scandal sang Department of Public Works and Highways (DPWH).
Dugang pa sang ahensya nga pagatapuson nila ang nasambit nga proyekto sini nga tuig kun sa diin may ara sang ₱33 bilyon budget para sa farm-to-market roads.
