Gin-hold sang kapulisan ang walo ka trabahante sa isa ka gina-renovate nga establisyamento sa Brgy. Sta. Filomena sa distrito sang Arevalo.
Ini matapos nga nga nagsugod ang isa ka renovation samtang ongoing pa lang ang pagproseso sang ila occupancy permit.
Sa interview sang Bombo Radyo kay Alyas Lea, tag-iya sang establisyamento, iya ginpahayag nga ang nagarenta sa 1st floor sang establisyamento amo ang isa ka pawnshop.
Pahayag niya nga nakacomply man sya sang occupancy permit sang nagligad nga Nobyembre 2025 apang wala sya nakahibalo nga wala pa ginapahanugutan ang pag-umpisa sang renovation kun wala pa matapos ang proseso.
Suno sa iya, naghatag man sang ‘go signal’ ang Office of the Building Official, rason nga nagpatigayon sang renovation.
Dugang pa ni Alyas Lea, gin-obra nya ang tanan niya nga obligasyon ilabi na ang mga kinahanglanun nga mga dokumento agud masugudan ang renovation.
Sa subong, padayon ang coordination sang Iloilo City Police Office (ICPO) sa nagkalain-lain nga ahensya agud mahibal-an ang iban pa nga mga detalye angot sa nasambit nga renovation.
Nagpahayag man si Police Major Sheila Mae Sangrines, Spokesperson sang ICPO nga ginpang-release na ang walo ka mga trabahante bangud kabahin lang ang pag-hold sa mga persona sang isa ka verification process agud masiguro kun lehitimo ang ila presensya kag ang ila trabaho sa lugar.
