Ginpanagtag sang Department of Agrarian Reform (DAR) ang kabug-usan nga 13,500 ka hektarya sang duta sa masobra 5,000 ka Agrarian Reform Beneficiaries (ARBs) sa Western Visayas.
Personal nga gin-turn over ni DAR Secretary Conrado Estrella III ang mga titulo sa ginhiwat nga ceremonial distribution kahapon nga adlaw Enero 12 sa Pototan Astrodome sa Pototan Iloilo.
Base sa datos sang DAR, 2,248 ka e-titles ang gin-release sa masobra 2,000 ka mga ARBs sa Capiz; masobra 1,400 ka e-titles sa 1,717 ka ARBs sa Iloilo; masobra 1,100 ka e-titles sa 1,107 ka ARBs sa Antique; 804 ka e-titles sa 496 ka ARBs sa Guimaras; kag 463 ka e-titles sa 461 ka ARBs sa Aklan.
Suno kay Estrella, ang Western Visayas amo ang pinaka-una nga rehiyon subong nga tuig nga nakabaton sang daku nga land title distribution.
Ginpabutyag man sini ang iya nga kalipay nga nahatag na ang titulo sang mga mangunguma nga pila na ka dekada ang naghulat agud mapanag-iyahan ang ila ginapanguma nga duta.
Ginpahanumduman man ni Estrella ang mga beneficiaries nga tipigan ang ila lupa kag indi pag-ibaligya, bangud libre ini nga gintugyan sang gobyerno sa ila.
Gindugang pa ni Estrella nga madamo pa gihapon nga mga mangunguma sa rehiyon ang wala pa sang titulo, gani lauman nga magapadayon ang DAR sa pagpanagtag sang libre nga land titles.
Sa pihak nga bahin, ginpahayag ni Jona Diaz, isa sa mga Agrarian Reform Beneficiaries sang Barangay Gemumua, Passi City, Iloilo, ang iya kalipay bangud sa ulihi may yara na sang titulo ang ila duta.
Sa interview sang Bombo Radyo kay Diaz iya ginpahayag nga ini ang pamana niya sa iya kabataan—isa ka kasiguraduhan nga indi na matakaw ang ila manggad bangud titolado na ang ila taramnan nga mais nga may kahilwayan nga 1.2 ka ektarya.
