Nagpahanumdom ang Bureau of Fire Protection- Iloilo City nga dapat mangin mahinalungon sa mga bagay nga posible magtuga sang kalayo sa tion sang Kasadyahan kag Dinagyang festival 2026.
Sa interview sang Bombo Radyo kay Fire Superintendent Melanie Habawel, Fire Marshall sang Iloilo City Fire Station, iya ginpahayag nga sa tunga sang selebrasyon, indi dapat pagkalimtan ang paglikaw sa sunog.
Suno sa iya nga 6 ka mga lugar sa siudad ang ila nga ginabantayan ilabi na ang ginakabig fire-prone bangud sa ikit-ikit nga mga balay.
Nagpahanumdom man ini sa publiko nga antes maglagaw padulong sa sentro sang mga aktibidad sa Dinagyang Festival, siguraduhon anay nga patay ang mga appliances kag ang kuryente nga may dako nga posibilidad nga magtuga sang kalayo.
Gin-athag man ni Habawel nga wala nagcommit ang Bureau of Fire Protection sang ila tanan nga mga fire trucks sa siudad para sa mga judging areas bangud nga nagabantay man sila sang mga areas nga may ara sang madamo nga history sang sunog.
