Ginapreparahan na sang Iloilo City Disaster Risk Reduction and Management Office (CDRRMO) ang ginakabig nga mga high-risk scenarios nga mahimo matabo sa tion sang Dinagyang Festival.
Sa interview sang Bombo Radyo kay Darwin Joemil Papa, Chief sang Disaster Response Division, iya ginpahayag nga may ara sang 4 ka mga scenarios ang ila nga ginabantayan.
Una, amo ang sunog nga mahimo matabo sa tion sang selebrasyon nga kun sa diin ang location sang Judging Area #3 nga sa Iloilo Sports Complex ang na-identify nga fire-prone area sang Bureau of Fire Protection bangud sa mga na-record nga numero sang sunog diri.
Ika-duha amo ang Extreme heat ukon tuman kainit nga mahimo tunaan sang pagkalipong sang mga performers kag mga tumalan-aw.
Ika-tatlo, ang ‘mass movement’ sa pag umpisa kag pagkatapos sang competition nga mahimo magtuga sang pagdas-ukanay sa entrance kag exit sang kada judging area.
Ika-apat, ang posibilidad sang bomb threats bangud apisar nga may security measures nga ipatuman, indi malikawan nga may magsabotahe sa aktibidad.
Suno kay Papa, ini ang mga rason kun ngaa gindugangan nila ang deployment sa kada judging area nga nagalab-ot sa 655 ka mga personnel.
Dugang ni Papa, naka red alert status na ang Operations Center kag iban pa nga mga emergency responders para sa seguridad sang publiko sa nasambit nga selebrasyon.
 ang ginakabig nga mga high-risk scenarios nga mahimo matabo sa tion sang Dinagyang Festival.){kind=link}