Magasaka na naman ang presyo sang produktong petrolyo sa masunod nga semana.
Sandig sa industry estimates sa Mean of Platts Singapore (MOPS) trading sa nagligad nga adlaw, yari ang gina-project nga paghulag sa presyo:
Gasoline – posible magsaka sang P0.60 per liter
Diesel – posible magsaka sang P1.35 per liter
Kerosene – posible magsaka sang P1.00 per liter
Suno sa Department of Energy-Oil Industry Management Bureau, wala pa nalakip diri ang operating cost sang mga kumpaniya sang langis kag iban pa nga premiums nga posible magtupa sa P0.40 tubtub sa P0.50.
Gina-angot sang ahensya ang potensyal nga price hike sa geopolitical tension sa Iran kun sa diin linibo ka mga indibidwal ang napatay bangud sa pagprotesta, kag may posibilidad pa nga mag-intra ang Estados Unidos sang Amerika.
Ini nga gamo suno sa DOE ang magaapekto sa pagsaka sa presyo apisar sang oversupply sang oil products sa una nga bulan sang 2026.
Ginamensyonar man sa projected numbers ang padayon nga pagluya sang balor sang Philippine Peso kontra sa US dollar. Kahapon, nagtakop ang trading sa bag-o nga historic low nga P59.46.
Gin-anunsyo sang fuel firms ang price adjustments sa kada Lunes, kag ginapatuman sa kada Martes sang aga.
Matandaan nga sang Martes, Enero 13, nagpasaka ang petroleum retailers sang P0.30 sa kada litro sang gasolina; P0.20 sa diesel; kag P0.30 sa kerosene. Ini ang pangtatlo nga sunod-sunod nga semana nga may price hike sa diesel kag kerosene.
