Mangayo sang bulig ang traffic authorities sa Special Task Group Dinagyang partikular sa Peace and Order Committee bangud sa mga ginaantisipar nga mga pagpamahog nga ila mabaton samtang naga-deliher sang trapiko sa Dinagyang Festival 2026.
Sa interview sang Bombo Radyo kay Retired Police Colonel Uldarico Garbanzos, head sang Iloilo City Traffic and Transportation Management Office (ICTTMO), iya ginpahayag nga may mga tricycle driver kag motorista nga nagabato kag nagapahog sa mga personnel sang ila opisina bangud nga nasabaran ang mga ini sa traffic scheme.
Partikular sini nga na-mensyonar nga may mga pagpanghangkat sa trapiko sa Magsaysay Road sa La Paz bangud may masami nga nagatalang sa emergency lanes nga para sa VIPs.
May kabudlayan man suno sa iya sa parking area nga ginagamit sa West Visayas State University (WVSU) bangud sa entry kag exit points.
Maga-deploy ang opisina sang masobra sa 800 ka mga personnel kun sa diin 450 para sa trapiko, 91 ang halin sa Special Services Division, may green guards man sa mga plaza, kag may police auxiliary sa mga vital buildings, kag iban pa.
Nagpanawagan man si Garbanzos sa publiko nga respetuhon ang traffic scheme bangud para man ini sa ikasulhay sang publiko samtang nga madamo ang volume sang tawo nga nagapadulong sa syudad para sa Dinagyang Festival.#
