* Ka-Bombo, ini nga balita ang may yara sang kaundan kaangot sa mental health, kag nagamensyonar man sang depression kag bullying.*
Ginsapubliko ni Miss Universe Philippines 2020 Rabiya Mateo nga na-diagnose ini nga may Major Depressive Disorder with Anxious Distress sadtong 2025.
Nagpaidalom ini sa medication kag nagkadto sa luwas sang pungsod agud nga indi siya ma-trigger sang mga tawo nga wala nakahibalo kun ano ang iya gina-agyan.
Suno kay Rabiya, tinuig man niya ini ginbatuan, kag wala siya sang plano nga isugid sa publiko ang iya kondisyon.
Apang gin-post sang Ilongga beauty queen ang diagnosis sa iya bilang panawagan nga untaton ang pagpang-bully.
Kagab-i, sunod-sunod nga posts ang ginhimo ni Rabiya nga nagapautwas sang iya kalain sang buot.
Nag-ugat ini matapos nag-abot siya sa Iloilo kahapon, kag nagpamangkot kun sa diin siya pwede makakaon.
Apisar nga may mga sweet kag matarong nga komento, may ara man sang mga netizens nga nag-bash kag naghikay kay Rabiya.
Bangud sang mga komento sang iban nga netizens, nagpahayag si Rabiya nga ginhimo man niya ang iya “best” nga i-represent ang Iloilo City, apang sobra-sobra na gid ang ginapanghambal sang iban nga mga tawo.
Nagpahanumdom ini nga maghinay-hinay lang kag magpakita sang kaayo ilabi na sa mga depressed nga mga tawo.
Nahibaluan nga tumandok sang Balasan, Iloilo si Rabiya.
Isa siya sa magapungko nga judge sa Miss Iloilo 2026 karon sa gab-i sa West Visayas State University Cultural Center.
Words by: Bombo Jissa Padios
