Madasig nga nadakpan ang suspek nga nagtuyo sa pag-hold up sa isa ka taxi driver sa Barangay Javellana, Jaro, Iloilo City matapos nga nabilin sini ang iya I.D. sa sulod mismo sang taxi.
Sa interview sang Bombo Radyo kay Police Major Eduardo Siacon Jr., hepe sang Iloilo City Police Station 9, iya ginpahayag nga maka-apat ka beses man nga nadasma ang suspek samtang nga nagapalagyo kag nagapauli sa ila nga balay.
Magluwas sa I.D., napang-check man ang CCTV footages kag natultulan ini sa Brgy. San Pedro, Jaro, Iloilo City paagi sa bulig sang barangay officials.
Suno sa pulis, may record nga alarm and scandal ang arestado. May impormasyon man nga may involvement ini sa ilegal nga droga, apang gina-verify pa ini sang mga pulis.
Nagapabilin ini sa kustodiya sang mga pulis kag posible nga mag-atubang sa reklamo nga robbery hold-up.
Nahibaluan nga sang nagdeklarar sang hold-up ang suspek, nakakita sang kahigayunan ang taxi driver nga makalumpat sa salakyan. Bangud sini, naglumpat man ang suspek kag nagkuyampad pauli.
Gasgas sa kamot kag pagpalanakit sa likod naman ang naagom sang taxi driver bangud sa amo nga insidente.
