Ginpangunahan sang Ilonggo nga abogado nga si Atty. Rodel A. Taton ang pagpasaka sang plunder, graft and corruption, kag technical malversation nga kaso batok kay former Department of Finance (DOF) Secretary Ralph Recto, may kaangtanan sa pagtransfer sang P60 billion nga excess funds sang Philhealth sa national treasury.
Magluwas kay Ralph Recto ,nadala man sa ginpasakaan sang kaso amo si former Philippine Health Insurance Corp. (PhilHealth) president Emmanuel Ledesma Jr.
Ini ang ikaduha nga tion nga sanday Recto kag Ledesma ang nagpangatubang sang kaso angot sa PhilHealth fund transfer, nga una na gindeklarar sang Supreme Court bilang unconstitutional.
Sa interview sang Bombo Radyo kay Atty.Taton, iya ginpahayag nga ini nga reklamo nga ginpasaka batok kay Recto kag Ledesma ang nag-ugat sa panawagan sang accountability, proper governance, kag husto nga paggasto sang public funds.
Kaupod man ni Atty. Taton sa pagfile sang kaso ang pila ka medical doctors halin sa Iloilo nga nagatuyo nga may ara sang responsable nga paggasto sa kwarta sang publiko para sa healthcare system.
Ginpahayag pa sini nga ang pag-transfer sang pondo nakaapekto sa epektibo nga pagpatuman sang Universal Health Care (UHC) kag nagresulta sa madamo nga problema sa pagbayad sang benepisyo sang mga miyembro sang PhilHealth, labi na sa mga pasyente nga may balayran sa ahensya.
Padayon naman ang proseso sang kaso bilang kabahin sang panawagan sang mga abogado kag medical professionals para sa hustisya, kaayuhan sang healthcare system, kag pagpsabat sang mga opisyal sang gobyerno nga ginatudlo may sala sa paggamit sang pondo sang publiko.
