Ginbawian gid sang kabuhi ang isa ka online seller matapos naka-eksperyensya sang tuman nga magdugo kag pagporma sang dugo sa iya mga ugat matapos gin-operahan agud magpadako sang dughan kag magpagamay sang butkon sa Sto. Tomas City, Batangas.
Ang biktima amo si alyas Angeline, 24-anyos, residente sang Lipa City, Batangas.
Ang nag-opera amo si alyas “Dr. Ruth” sang Cinco Marias Aesthetic Clinic and Wellness Spa nga nagapangatubang subong sang reklamo nga Reckless Imprudence Resulting in Homicide.
Natabo ang operasyon sa online seller sang Enero 8 sang aga sa aesthetic center kun sa diin gin-perform ni Dr. Ruth ang arm liposuction kag breast augmentation.
Wala anay ginpapauli ang biktima agud obserbahan tubtob nga gindala ini sa ospital.
Makaligad ang duha ka adlaw, napatay ini bangud sa “hypovolemic shock” kag “disseminated intravascular coagulation” ukon tuman nga pagdugo base sa death certificate.
