Nagluntad ang isa ka tension sa tunga nanday Vice Gov. Debuque kag Board Member Mondejar sa ginhiwat nga session kahapon, Enero 21.
Ini matapos nga luyag kuntani ni Mondejar nga magpasar sang isa ka resolution sa committee report ni Board Member Rolando Distura.
Dayun man nga nagpanugyan si Debuque nga igabutang lamang sa unassigned business ang luyag sini nga idugang nga resolusyon bangod nga indi madali ukon mahapos ang magsal-ot sang isa ka resolusyon ilabi na kun wala ini nakaagi sa committee hearing.
Nag-anunsyar man sang isa ka recess si Debuque apang nagpamilit gid si Mondejar, rason nga ginhambalan sya sang Bise Gobernador nga magpungko.
Ginsunod man ini ni Mondejar kag nagpasugot na lamang nga ibutang ini sa unassigned business.
Sa interview sang Bombo Radyo kay Vice Governor Lee Ann Debuque, iya ginpahayag nga wala sini ginadumilian si Baord Member Mondejar nga mag-propose sang resolusyon, apang suno sa iya, dapat ini una nga ma-hitso sa lebel sang Committee on Infrastructure antes pa man i-deliver ang committee report sa plenary.
Suno naman kay 2nd District Board Member June Mondejar, wala man nagalain ang iya nga buot kay Debuque bangud iya man nga naintindihan nga may ara gid sang tyempo nga lain-lain ang panan-aw sang kada isa.
