Nagakahangawa ang mga Ilonggo nga nagatrabaho sa kampo nga madulaan sila sang palangabuhian kun magpadayon ang krisis sa industriya sang tubo.
Lakip sila sa nag-upod sa protesta sang sugarcane workers sa syudad sang Passi subong nga semana agud magpanawagan nga maghulag na ang gobyerno sa tunga sang pagsarurot sang presyo sang kalamay.
Sa interview sang Bombo Radyo kay Terry Balboa, isa ka trabahador sa kampo, iya ginpahayag nga maapektuhan gid sila pananglitan mag-untat sa pagtanum sang tubo ang ila nga amo.
Suno kay Balboa, madamo sa ila ang wala man sang kaugalingon nga uma, kag ang kampo lang gid ang ila ginasaligan nga trabaho.
Pananglitan madulaan sila sang trabaho suno sa iya, makaluluoy gid ang ila kahimtangan bangud maapektuhan pati ang pag-eskwela sang ila kabataan.
Subong suno sa iya, pagkatapos nga nakapatapas na sang tubo, wala anay gintandog ang duta sang ila amo bangud sa problema subong sa tuman ka nubo nga presyo sang kalamay.
Matandaan nga ginpangunahan sang Jalasig Sugar Planters Association ang protesta sa syudad sang Passi. Ginapanawagan nila ang pag-akto sang gobyerno sa tunga sang tuman ka nubo nga farm-gate prices kasunod sang pagpanglakaak sang imported nga kalamay kag kapalpakan sang Sugar Regulatory Administration (SRA) nga ma-regulate ang merkado.#
