Napuno sang pagpasalamat ang tagipusuon sang mga deboto nga Ilonggo nga nag-upod sa fluvial kag solemn foot procession.
Kabahin ini sang tuigan nga selebrasyon sang Dinagyang Festival sa Iloilo bilang pagpasidungog kay Señor Santo Niño.
Isa sa mga nag-upod sa prusisyon amo si Evelyn Garnica, 63-anyos, nga masobra 50 ka tuig na nga deboto.
Nag-umpisa ini sang naga-upod-upod pa lamang siya sa iya nga iloy sang una kag nadala niya ang pagtuo tubtub nga siya naman ang may kaugalingon nga pamilya.
Ginpasalamatan sini ang Señor Santo Niño sa tanan nga bugay ilabi na sa ikaayong lawas.
Suno kay Garnica, mabudlay ang ila pangabuhi ilabi na bangud nawad-an siya sang negosyo sa Iloilo Central Market bangud sa tuman ka pigado nga kita.
Sa iya pagsulod sa simbahan, ginpangabay sini nga bisan sa puraot nga kabuhi, makalikaw sa balatian ang iya mga apo, iya bana, kag iban pa nga katapo sang ila pamilya.
Sa pihak nga bahin, apisar masako man sa iya trabaho bilang tricycle driver, naghingalit gid ang isa ka deboto nga si Mild Enriquez nga mag-upod sa prusisyon.
Suno sa iya, deboto man sang una ang iya nga Lola, kag diri siya nakatuon sa paghupot man sang pagtuo nga amo suno sa iya ang nagabulig sa iya nga makalikaw sa mga balatian.
Nahibaluan nga isa ang fluvial parade sa nagapanguna nga relihiyoso nga aktibidad sa Dinagyang. Ginsundan ini sang solemn foot procession nga nagsugod sa Muelle Loney Street pakadto sa San Jose de Placer Church sa Plaza Libertad nga gin-updan sang mga deboto nga may mga dala nga imahe ni Señor Santo Niño. Bida man sa amo nga prusisyon ang mga kabataan nga ginpasuksukan sang bayo sang Santo Niño ukon Holy Child. # (Photo: Iloilo City Government)
