Nag-abante na ang Pinay tennis star nga si Alex Eala sa round of 16 sang labing-una nga Philippine Women’s Open matapos ginlutos si Alina Charaeva sang Russia, 6-1, 6-2, sa Rizal Memorial Tennis Center.
Espesyal man nga adlaw ang kumpetisyon ni Eala bangud ini ang iya una nga international match nga ginhiwat sa atubang sang mga Filipino fans diri sa Pilipinas.
Mahapos para sa world no. 49 nga Filipino pride ang paglutos sa Russian player sa imbukada nga set. Sa second set, may medical time-out nga natabo kag ginkinahanglan pa ni Eala nga makalampuwas sa 0-2 deficit antes sini dalayon nga napierde si Charaeva nga subong world No. 163.
Sang ulihi, ginklaro sini nga wala sang dapat nga kabalak-an sa medical time-out bangud indi man seryoso nga sakit ang iya nabatyagan.
Sunod nga atubangon ni Eala ang magadaog sa tunga sang hampang nanday Himeno Sakatsume kag Nao Hibino nga pareho nga halin sa Japan.
Ini ang una nga hampang ni Eala matapos nalutos sa first round sa Australian Open sang nagligad nga semana batok sa American player nga si Alycia Parks.
Ini man ang una nga tion nga naka-host ang Pilipinas sa isa ka WTA 125 event.
