Naglab-ot sa 265 ka mga indibidwal ang nadakpan sang Iloilo City Anti-Smoking Task Force (ICAST) bangud sang pagbayolar sang Regulation Ordinance No. 2021-255 ukon ang Comprehensive Anti-Smoking Ordinance sa syudad sa tion sang selebrasyon sang Dinagyang Festival 2026.
Sa interview sang Bombo Radyo kay Iñigo Garingalao, head sang ICAST, iya ginpahayag nga ang nasambit nga numero ginabug-usan sang mga lokal nga pumuluyo kag mga pangayaw nga nagbisita sa siyudad para sa Dinagyang.
Suno kay Garingalao, mas manubo ini kun basehan ang kabug-usan nga selebrasyon sang Dinagyang isa ka semana antes ang highlights sini.
Dugang pa niya, daku ang ginbulig sang padayon nga information dissemination sang lokal nga panguluhan, rason nga mas na-emphasize ang kampanya sang siyudad nga “Smoke-Free City.”
Ginpahayag man ni Garingalao nga nagalaum ang ila opisina nga mangin mas manubo pa gid ang numero sang mga violators sa masunod nga tuig.
Ini bangud sa padayon nga pagpatuman sang ordinansa kag pag-edukar sang publiko nahanungod sa epekto sang pagpanigarilyo sa pampubliko nga mga lugar.
Ginpunto man sang ICAST nga ang Dinagyang Festival isa sa pinaka-importante nga aktibidad sang Iloilo City, gani ila gid ginatagaan sang importansya ang pagpatuman sang mga ordinansa, kaangay sang anti-smoking ordinance.
