Natigayon na nga mapasakaan sang kaso ang duha ka pangayaw nga suspek sa pagpangawat sa balay ilimnan sa Mandurriao, Iloilo City, pasado alas-dos sang kaagahon sang Enero 25, kadungan sang Dinagyang Festival 2026.
Nahibaluan nga madinalag-un nga nadakpan sang Iloilo City Police Station 10 (ICPS 10), sa pagpamuno ni PCPT Val Cambel, ang duha ka suspek nga amo sanday alias “Ryan,” kag alias “Bong,” nga lunsay residente sang Malate, Manila.
Sa interview sang Bombo Radyo kay PCapt. Cambel, iya ginpahayag nga matapos ang ginpatigayon sang mga kapulisan nga cellphone tracking agud ma-locate ang lokasyon sang nadula nga cellphone, ila gilayon nga natumod ang mga suspek sa pagpangawat.
Base sa rekord halin sa City Investigation and Detective Management Unit (CIDMU), ila nadiskobrehan nga si alias “Bong” may yara sang nauna nga kaso nga paglapas sa Republic Act 7610 ukon ang Special Protection of Children Against Abuse, Exploitation and Discrimination Act. Samtang si alias “Ryan” may yara man sang na-record nga kaso sang pagpangawat.
Suno kay Cambel grupo nga nagpadulong diri sa syudad ang ini nga mga suspek nga ginalakipan sang anom pa gid nila ka mga upod nga halin man sa bahin sang Luzon.
Suno pa sa iya nga modus na sang mga ini nga magkadto sa mga aktibidad kaangay sang Dinagyang agud nga makapangawat.
Ginakabig naman nila nga organisado ang kaangay nga grupo kag may ara sang nagamando sa mga ini nga magpatigayon sang nasambit nga pagpangawat.
