Ginpasidunggan sang 15th Sangguniang Panlalawigan ang mga festival nga nagpasakop sa bag-o lang natapos nga Kasadyahan sa Kabanwahanan 2026, bilang pagkilala sa ila kontribusyon sa kultura kag turismo sang probinsya.
Una nga nagpasar sang Resolution of Commendation si Ex Officio Board Member Amalia Debuque, Presidente sang Liga ng mga Barangay, bangud nagkampyon ang Banaag Festival sang banwa sang Anilao, kag bangud man sa madamo nga mga award nga gindala pauli sang nasambit nga grupo.
Dugang pa diri, nagpasar man sang resolusyon si Board Member Jason Gonzales agud pasidunggan ang Tultugan Festival sang Maasin, Iloilo, nga nagrepresentar sang 3rd District.
Sa pihak nga bahin, nagpasar man sang resolusyon si 4th District Board Member Dominic Paul Oso agud pasidunggan ang Kahilwayan kag Kasag Festival.
Gin-commend guid sang Provincial Board ang mga nasambit nga festival bangud sang manami sini nga impact agud ipakita ang lokal nga kultura kag pagpauswag sang turismo sa Iloilo.
