Tinguhaan sang Iloilo Festivals Foundation Incorporated (IFFI) nga ibalik ang mga banderitas sa masunod nga tuig para sa Dinagyang Festival, suno sa pamunoan sang organisasyon.
Sa interview sang Bombo Radyo kay Judgee Peña, Chairman sang IFFI, iya ginpahayag nga ang mga sponsor mismo ang nagdesisyon nga indi magbutang sang banderitas subong nga tuig bangud ginakabig ini nga isa ka distraction sa mga dalanon.
Suno kay Peña, ila man tinguhaan nga ibalik ang apat tubtob lima ka mga judging areas, kag ginatan-aw man ang posibilidad nga ibalik ini sa Iloilo City Proper agud mangin isa lang ka distrito ang judging area.
Ang amo nga plano ginadiskusyunan pa kaupod si Mayor Raisa Treñas, bangud sa madamo nga pumuluyo ang nagbilin sang negatibo nga komento bangud wala sang banderitas sa Dinagyang 2026.
Ginpahayag man ni Peña nga ginapamatian sang IFFI ang feedback sang publiko sa kun ano pa ang makabulig pakamaayo sa ginakabig isa sa pinakadako nga festival sa pungsod.
Ginaklaro man sang IFFI nga indi pa sigurado ang amo nga plano, apang ila guid ini tinguhaan nga maplastar para sa mas manami nga Dinagyang Festival.
Samtang sa pihak nga bahin paga-diskusyonan man sang Iloilo Festivals Foundation Inc., (IFFI) ang plano nga pagpasakop sang Tultugan Festival sa Dinagyang Tribe Competition sa masunod nga tuig.
Madumdoman nga una na nga ginpahayag ni Mayor Francis Amboy sang Maasin nga naka-Grand Slam sa nasambit nga kompetisyon nga may plano ini nga magpasakop sa Dinagyang Tribe Competition kun hatagan sang kahigayunan.
Sa interview sang Bombo Radyo kay Eric Divinagracia, Dinagyang Festival Director, iya ginpahayag nga paga-istoryahan nila ini kaupod ang iban pa nga mga Board of Directors sang IFFI.
Suno kay Divinagracia, yara na sa history sang Dinagyang nga may mga tribu nga nagapasakop apisar nga indi nakabase sa siyudad sang Iloilo, gani wala sang kaso kun magapasakop liwat ang Tultugan Festival sang Maasin, Iloilo.
Ginhalimbawa man sini ang pag-partisipar sang iban nga mga festival kaangay kaangay na lang sang Binirayan sang Antique.
