Naalarma ang pila ka mga motorista matapos makit-an ang isa ka lapsag nga nagakamang sa kilid sang national highway sa Barangay Tabalong, Dauis, Bohol, sang Martes, Enero 27, 2026.
Gilayun nga nag-untat ang mga ini kag ginpahigad ang bata, agud indi mabungguan sang mga nagalabay nga salakyan.
Base sa dash cam footage, makit-an nga malapit gid ang lapsag sa mga nagalabay nga mga salakyan, nga naghatag sang kabalaka sa iya seguridad.
Sa ibestigasyon sang Dauis Municipal Police Station, nahibaluan nga bag-o lamang nagselebrar ang lapsag sang iya una nga kaadlawan apang may nagluntad nga wala pag-intindihanay sa tunga sang iya amay kag iloy antes ang ginapahayag pagbilin sa iya sa karsada.
Ginapatihan nga ginbayaan ang nasambit nga lapsag sang iya iloy sa highway agud makuha ang atensyon sang iya bana, nga nagpadayon sa pagtrabaho bisan ginpangabay sang iloy nga magpabilin tungod kaadlawan sang bata.
Sa karun, yara sa kustodiya sang lolo ang lapsag samtang padayon ang imbestigasyon sang pulisya kag posible nga may kaso nga ipasaka batok sa mga ginikanan.
