Nagapang-agda gid ang Archdiocese of Jaro sa tanan nga mga deboto nga magpakigbahin sa nagahilapit nga kapiyestahan ni Nuestra Señora dela Candelaria, ang patrona sang Western Visayas, sa Pebrero 2.
May kaangtanan diri, ginpagwa na man sang Jaro Metropolitan Cathedral ang schedule sang mga misa sa National Shrine of Our Lady of Candles sa Jaro.
Sa Pebrero 1 nga bisperas sang piyesta, may Solemn Vesperal Mass sa las-5 sa hapon nga pangunahan ni His Grace, Most Rev. Jose Romeo O. Lazo sang Archbishop-emeritus of Jaro.
Ini ang pagasundan sang Rite of Coronation of the Image sa Cathedral’s Balcony nga pangunahan naman ni His Grace Most Rev. Midyphil B. Billones.
Sa adlaw mismo sang kapiestahan sa Pebrero 2,las-siete sa aga, may hiwaton nga Solemn Pontifical Mass kaupod ang Blessing of Candles kag pangunahan sa gihapon ni Archbishop Billones.
Hiwaton naman las 5:30 sa hapon pagkatapos sang Solemn Procession, ang Solemn Concelebrated Mass nga pangunahan ni His Excellency Most Rev. Ruben Labajo nga Bishop sang Diocese of Prosperidad sa Agusan del Sur.
Ang tema subong nga tuig amo ang “Nuestra Señora dela Candelaria: Bearing the Light for Deeper Faith and Obedience Towards Accountable Stewardship.”
Sa interview sang Bombo Radyo kay Rev. Fr. Angelo Colada, director sang Commission on Social Communications sang Archdiocese of Jaro, iya ginpahayag nga sa subong nga tuig, wala sang pagbag-o sa dalagan sang selebrasyon.
Suno kay Colada, magapabilin gihapon nga sentro sang kapistahan ang pagpadalom pa gid sang pagtuo kag debosyon.
Gindugang man ni Colada nga available na ang perdon candles sa Libreria Candelaria, Jaro Cathedral kag iban nga affiliated retailers.
Nagpangabay naman si Colada nga indi paghingalitan ang kapiestahan nga magpamentaha sa pagbaligya sang perdon candles nga ang presyo ang yara lang sa P40 kada isa.
