Ginakonsiderar subong sang Civil Aviation Authority of the Philippines (CAAP)–Iloilo ang pagpatuman liwat sang first screening sa ground floor sang Iloilo International Airport.
Kasunod ini sang shooting incident sa second floor sang airport matapos nga nagbato ang isa ka pasahero sang na-detect nga may dala ini nga kutsilyo samtang yara sa boarding area.
Bilang resulta, naigo ang lalaki sa dughan.
Ini amo si Roland Lañojan, 54 anyos, isa ka security guard, kag residente sang Tayong, Sagay, Camiguin.
Suno kay Mr. Arthur Parreño, Public Information Officer sang CAAP-Iloilo, ang pagbalik sang first screening amo ang ginalantaw nga solusyon para indi na masulit ang kaangay nga insidente.
Sa subong, suno sa iya, wala pa sila nakadihon sang nagakaigo nga rekomendasyon.
Bilang temporaryo nga solusyon, mas hugtan anay ang seguridad paagi sa pagdugang sang security personnel kaupod na ang mga katapo sang PNP.
Wala naman sini gin-ako ukon ginpanginwala nga may lapses sa security protocol rason kun ngaa nakalusot ang nasambit nga pasahero.
Samtang, wala pa sang bastante nga impormasyon nga nakuha ang otoridad sa lalaki nga natiruhan.
Suno kay PCol. Bayani Razalan, director sang Iloilo Police Provincial Office, wala nagakooperar si Lañojan sa ila kag wala nagasabat sa ila mga pamangkot.
Suno kay Razalan, namalibad man ang amo nga lalaki nga magsugid kun ngaa yari ini sa Iloilo kag kun diin siya nag-istar.
Nakit-an naman sa driver’s license ni Lañojan nga sa Talamban, Cebu ang iya address.
Apang sa lain nga identification card, Camiguin ang nakabutyang nga address.
Dugang ni Razalan, nagapabilin subong sa ospital ang lalaki apang hilway na sa katalagman apisar nag-angkon sang igo sa dughan malapit sa iya ilok.
