Nagpadala ang Estados Unidos sang Amerika sang dugang nga warship sa Middle East samtang nga nagadaku ang tensyon sang pungsod batok sa Iran.
Sandig sa inisyal nga reports, ang pinakaulihi nga nag-abot sa rehiyon amo ang USS Delbert D. Black.
Gindesinyo ini nga warship para sa multi-mission capabilities lakip na para sa air warfare, anti-submarine warfare, naval surface fire support, kag surface warfare.
Bangud sini, nagdangat na sa anum ang destroyers sang Estados Unidos nga naka-posisyon sa Middle East, magluwas pa sa aircraft carrier kag tatlo ka iban pa nga littoral combat ships.
Manotisyaran nga pareho ini sa deployment nga nakita sang nagligad nga tuig sang ginsaylo man sa rehiyon ang US air defense hardware pananglitan magbalos ang Iran bangud sa pagbomba sang US sa tatlo ka Iranian nuclear sites kadungan sang gyera sang Israel kag Iran sang Hunyo.
Sa pihak nga bahin, sa Iran, may nag-abot naman nga 1,000 drones sa nagkalain-lain nga sangay sang Army samtang ginahandaan ang posible nga military confrontation.
Ini nga development sa tunga sang duha ka magkaaway nga pungsod ang kasunod sang pagpamahog liwat ni US President Donald Trump nga bombahan sini ang Iran kun indi ini magsugot nga magnegosyar para sa bag-o nga nuclear deal.
Ginmensyonar ni Trump nga magapadala siya sang ‘armada’ ukon madamo nga mga warship, kag nagpaandam man sang posible nga military action kasunod sang anti-government protests sa Tehran.#
