Preparado kag naka-standby na ang mga security personnel sa pagbantay sa nagahilapit nga pista ni Nuestra Señora de la Candelaria nga amo ang patrona sang Western Visayas.
Sa interview sang Bombo Radyo kay PMAJ. Shella Mae Sangrines, Spokesperson sang Iloilo City Police Station, iya ginpahayag nga magluwas sa duha ka Police station sa distrito sang Jaro, maga-deploy man ang Iloilo City Police halin sa mobile patrol units, Iloilo City Mobile Force Company kag SWAT Personnel.
Suno man sa iya, hugot man nga pagabantayan ang Jaro Plaza bangud sa masami nga nagakalatabo diri sa mga dalagko nga mga aktibidad.
Nagalaum man ini nga magabuligay ang mga Ilonggo sa pagselebrar sang pista agud nga liwat nga mag zero incident ang siudad kaangay sang Dinagyang Festival 2026.
Sa interview naman sang Bombo radio kay PMaj. Eduardo Siacon Jr., Officer-in-charge sang Iloilo City Police Station 9, iya ginpahayag nga magabutang sila sang apat ka mga screening areas sa palibot sang Jaro Metropolitan Cathedral agud nga indi makasulod ang mga deadly weapons, vape, sigarilyo, kag mga makahulubog nga mga ilimnon.
Nagpahayag man ini sa mga may plano nga mag inom-inom sa kapistahan nga mangin responsable sa ila pag-inom agud nga malikawan ang kun ano man nga ginamo.
