Dismayado ang pamilya sang Ilonggo seafarer nga si Jujerick Layer bangud sa ginaalegar nila nga kulang ang koordinasyon sang shipping company sa ila nga pamilya kag sa mga survivors sang naglugdang nga RoRo Vessel sa baybayon sang Basilan.
Si Layer amo ang residente sang Barangay Tipolo, Mina, Iloilo, kag isa man sa duha ka mga Ilonggo survivors sa nasambit nga insidente.
Sa interview sang Bombo Radyo kay Jose Pendioday, Lolo ni Layer, iya ginpahayag nga ang ila pamilya nalang ang maga-gasto para sa pagpa-uli sang iya nga apo.
Suno pa kay Pendioday, wala gid maghatag sang update ang Aleson Shipping Lines, Inc. nga amo ang nagapanag-iya sang MV Trisha Kerstin 3 kun ano ang mabulig sang kumpaniya sa ila himata kag sa iban pa nga mga survivors.
Samtang nagpguwa naman sang offcial statement ang Aleson Shipping Lines Inc., kun sa diin nagapagkig-unong man ini sa mga pamilya sang mga nagtaliwan nga mga pasahero.
Nagpahayag man ang kumpaniya nga ila naman nga ginatinguha-an nga iproseso ang igahatag nga financial assistance sa tanan nga mga apektado kag biktima sang insidente.
