Nalakip ang lima ka mga hepe sa syudad sang Iloilo sa 46 ka mga station commander sa Western Visayas nga gin-relieve epektibo subong nga adlaw, Enero 30.
Sandig sa Issuance of Orders for Reassignment kag Resolution 2026-01 sang nagligad Enero 27, 2026, nalakip sa lista ang mga masunod:
- Police Captain Benjie Dicen – Iloilo City Police Station 6 (ICPS 6)
- Police Captain Michael Tuburan – ICPS 7
- Police Captain Lester Oliveros – ICPS 8
- Police Major Eduardo Siacon Jr. – ICPS 9
- Police Captain Val Cambel – ICPS 10
Magluwas sa lima halin sa Iloilo City Police Office (ICPO), may 11 naman nga gikan sa Antique Police Provincial Office (PPO), anum ang halin sa Aklan PPO, 10 ang halin sa Capiz PPO, isa sa Guimaras PPO, kag 13 ang halin sa Iloilo PPO.
Sa interview sang Bombo Radyo kay Police Major Lailyn Sencil, spokesperson sang Police Regional Office (PRO) VI, iya ginpahayag nga ini nga reassignment ang kabahin sang regular administrative process ukon ang rotation sang commanders nga nakaserbe na sang isa tubtub duha ka tuig ukon mas malawig pa bilang hepe.
Gin-deliberate kag ginproseso ini suno sa iya paagi sa Second Level Officers Placement Board agud masigurado ang transparency, objectivity, kag istrikto nga pagsunod sa existing nga mga patakaran kag guidelines sang PNP.
Ang pag-relieve kag pag-reassign sa ila ang nakasandig sa naka-establisar nga criteria suno sa PNP nga nagalakip sang kadugayon sang pagtinir sa posisyon sini subong, cumulative tenure of duty sang at least anum ka tuig, kag merit- kag performance-based nga mga konsiderasyon.
Ginklaro PRO VI opisina nga kinaandan ini nga ginahimo sang PNP kag wala sang na-involve nga kapaltahan.
Wala pa ginpatpat kun sa diin ma-assign ang ginpang-relieve nga mga hepe, apang sandig sa inisyal nga pahayag sang opisina, may yara sang iga-assign sa regional headquarters.#
