Gintugyan na sa chairperson sang Committee on Communication and Public Information sa Iloilo City Council kun ano ang mangin desisyon sini kaangot sa wala pa na-reconcile nga mga probisyon sa duha ka ordinansa nga ginduso kaangot sa Freedom of Information (FOI).
Ini matapos nga nagtakop na ang ginpatigayon nga committee hearing agud nga maplastar ang halos pareho lang nga ordinansa nga ginduso nanday Councilor Nene Dela Llana kag Councilor Sheen Marie Mabilog.
Sa interview sang Bombo Radyo kay Dela Llana, iya ginpahayag nga kun makahimo na sang committee report ang committee chairperson nga si Councilor Atty. Sedfrey Cabaluna, maga-debate na sila ni Mabilog sa sesyon sang konseho.
Pahayag pa ni Dela Llana, duha ka beses nga gin-amyendaran ni Mabilog ang iya nga ginaproponer nga ordinansa, gani nga pag-abot sa committee hearing, halos pareho na sila kag wala na sila ginbudlayan pa.
Lakip sa gintumod sini nga kinalain sa ila nga ordinansa amo ang iya ginaduso nga FOI desk agud nga mas plastado kag dira na magkadto ang mga pumuluyo kag magpamangkot kaangot sa ila kinahanglan nga impormasyon.
Ginaduso man ni Dela Llana nga regular employee ang mangin head sang FOI desk bangud sensitibo ang mga impormasyon nga uyatan sini, kag agud nga may salabton man ini pananglitan may mga sala.
“Councilor Cabaluna will deliver his committee report, and then i-refer back niya na sa amon, and then we can debate on the floor, and then hopefully mahatagan naton ang aton syudad sang best version sang Freedom of Information. Everybody wins, tanan daog,” pahayag sang konsehal.
“I will leave it to his sound judgment kag sa wisdom niya [ni Councilor Cabaluna], kag once nga ibalik ya sa amon, we will debate,” dugang pa ni Dela Llana.
Matandaan nga sang Nobyembre 27, 2025 sang una nga ginpatigayon ang hearing agud diskusyunan ang duha ka magkatuhay nga ordinansa sang duha ka nasambit nga konsehal.
.){kind=link}