Arestado na sang kapulisan ang mga suspek nga ginatudlo yara sa likod sang pagpatay kanday Police Senior Master Sergeant Diane Marie Mollenido kag sa otso-anyos nga bata sini nga lalaki nga si John Ysmael.
Suno kay National Capital Region Police Office (NCPRO) Chief PMGen Anthony Aberin, nadakpan sa Quezon City ang mga suspek.
Ini amo ang isa ka car agent kag iya bana nga isa ka dismissed police officer. Sa inisyal nga reports, kaina sang kaagahon natigayon nga pag-aresto.
Natalana pa nga ipatpat sang mga kapulisan ang pag-aresto kag ang dugang nga detalye sa identity sang nagkaladakpan.
Matandaan nga nasapwan ang bangkay sang iloy sa Enero 24 sa creek sa Pulilan–Baliuag Bypass Road sa Barangay Dulong Malabon, Pulilan, Bulacan. Lima ka adlaw ang nagligad, nakit-an si John Ysmael sa maligwin nga lugar sa Barangay Maluid, Victoria, Tarlac.
Pareho na nga yara sa advanced state of decomposition ang mga bangkay sang nasapwan.
Napatay si Sergeant Mollenido bangud sa samad tuga sang pagkatiro sa iya nga ulo, samtang napatay naman ang bata bangud sa asphyxia ukon kakulang sa hangin.
Sandig sa pamilya, ulihi nakit-an nga buhi ang mag-iloy sang Enero 16, kag opisyal nga gin-report sa awtoridad nga missing sila sang Enero 19.
Sa inisyal nga imbestigasyon, natalana kuntani sila nga makigkita sa car agent sa Novaliches, Quezon matapos magbaligya sang salakyan.
Magapatigayon man ang pulis sang DNA tests sa mga biktima matapos may nakit-an nga tinulo sang dugo kadungan sang pag-conduct sang luminol test sa balay sang agent sa Quezon.
Gina-establisar pa sang kapulisan kun ano ang motibo sa likod sang krimen.#
