Pasado na sa Sangguniang Panlalawigan ang ordinansa nga ginduso ni Board Member Rolando Distura nga may tinutuyo nga mas mapasangkad ang pagpa-intindi sa publiko sa mga impormasyon nahanungod sa West Philippine Sea.
Sa interview sang Bombo Radyo kay Distura, iya ginpahayag nga ginpatigayon nila ang ordinansa matapos nga wala ginasunod sang iban nga pungsod ang rulings sang international court kag ang historical background bisan pa nga nagdaug ang Pilipinas sa article ruling.
Isa man ini ka tikang agud nga ma-incorporate ang historical context sang West Philippine Sea kag 2016 arbitral ruling sa idalom sang United Nations Convention on the Law of the Sea (UNCLOS) nga igatudlo sa mga studyante.
Nagpasalamat man ini sa iya kaupod nga si Board Member Gonzales nga amo ang Chairperson sang Committe on Education kaupod ang iban pa nga mga Sangguniang Panlalawigan members nga nagsuporta sa ordinansa.
Kasunod sini, mangin West Philippine Sea Day sa Iloilo ang 2nd Wednesday sang Setyembre kada tuig nga nagasanto man sa Maritime National Month.
