Nagpaguwa sang executive order si Iloilo City Mayor Raisa Treñas nga nagasuspinde sang klase sa tanan nga lebel sa mga eskwelahan sa distrito sang Jaro sa Lunes, Pebrero 2.
Kadungan ini sang Jaro fiesta ukon ang kapistahan ni Nuestra Señora dela Candelaria nga amo ang patrona sang Western Visayas.
Kinaandan nga nagadugok ang linibo nga mga deboto halin sa Rehiyon 6 kag sa iban pa nga mga lugar kadungan sini nga kapistahan.
Suno sa alkalde, ginrekomendar ni Retired Police Colonel Uldarico Garbanzos, head sang Traffic and Transportation Management Office, ang suspension sang klase bangud sa natalana nga pagsirado sang mga mayor nga dalanon nga pagahiwatan sang religious celebration.
Sa executive order sang alkalde, gina-engganyo man sini ang mga institusyon ukon eskwelahan sa guwa sang distrito sang Jaro nga mag-suspend man sang face-to-face classes kun maapektuhan man sila sang pagsirado sang mga dalan kag serye sang religious kag cultural events sa pista.
Ginatugyan naman sang alkalde sa discretion sang mga pinuno sang government agencies kag sa mga private business owners kun maga-suspinde sila sang trabaho sa amo nga adlaw.
Nagdesisyon man ang iban nga mga buluthuan sa distrito sang La Paz, Iloilo City nga i-suspinde man ang ila klase bangud sa ginaekspektar nga pagpugok sa trapiko kag kabudlayan sa transportasyon kadungan ang Jaro Fiesta sa Lunes, Pebrero 2.
Lakip sa nag-anunsyo sang suspension amo ang West Visayas State University (WVSU), Iloilo Science and Technology University (ISAT U) kag Hua Siong College of Iloilo sa tanan nga lebel.
Ginpili na lang sang pila ka eskwelahan ang pagpatigayon sang klase paagi sa asynchronous online mode.
Sa interview sang Bombo Radyo kay Dr. Heinz Gumaquil, Public Information Officer sang ISAT U, iya ginpahayag nga ila na lang ginpili ang pag-shift sa online classes agud indi mabudlayan ang ila mga estudyante sa pag-commute.
Dugang pa niya, maga-resume gilayon ang regular nga klase sang ISAT U sa Pebrero 3 pagkatapos mismo sang kapistahan.
Nagpangabay man ang administrasyon sa mga estudyante sa ila paghangop sa ginpatuman nga tikang para sa convenience sang tanan.
