Nagpahanumdum si Jaro Archdiocesan Social Action Center (JASAC) Director Msgr. Meliton Oso sa mga tumuluo nahanungod sa matuod nga kahulugan sang subong nga tuig nga kapistahan ni Nuestra Señora de la Candelaria, nga ang Mahal nga Iloy Birhen Maria isa ka Light Bearer ukon tagadala sang kapawa para sa mga tawo.
Suno kay Msgr. Oso, importante nga mahangpan sang tumuluo nga si Maria indi amo ang kapawa kundi si Hesus nga iya ginakungkung amo ang matuod nga kapawa sang kalibutan.
Si Maria, bilang Iloy, amo lamang ang nagadala kag natugyanan nga mangin represenstasyon ni Hesus sa pagbulig sa iya pagpalapnag sang kasanag sa sini nga kabuhi.
Ginpaathag niya nga ang debosyon kay Maria nagadala palapit kay Hesus ukon “To Jesus through Mary.”
Ginlaragway man ni Msgr. Oso si Maria bilang matuod nga ehemplo sang stewardship ukon kaangay sang tinugyanan lamang sang kabuhi nga ginhatag sang Diyos.
Gin-emphasize man sini nga ang kabuhi sang tagsa ka tawo isa ka “breath of the Divine” kag “spark of the Divine.”
Suno kay Msg. Oso isa ini ka balaan kag sagrado nga bugay nga dapat halungan kag tipigan halin pa lamang sa taguangkan sang iloy asta sa adlaw nga igalubong na ang isa ka tawo.
Ini nga pagtulun-an, suno kay Msgr. Oso, nagarepresentar sang matuod nga stewardship nga mangin masinulundon sa kabubut-on sang Mahal nga Diyos para may ara sang klaro nga direksyon ang kabuhi sang tagsa ka tawo.
